उल्हासनगर: नीतू विश्वकर्मा

महामाया असंघटित कामगार संघटनेच्या वतीने क्रांतिज्योती सावित्रीबाई फुले यांच्या जयंतीनिमित्त विशेष कार्यक्रमाचे आयोजन करण्यात आले. या कार्यक्रमाचे प्रमुख मार्गदर्शक म्हणून आनंदा दादा होव्हाळ आणि समाजसेवक शशिकांत दायमा उपस्थित होते.

कार्यक्रमाचा मुख्य विषय “शिक्षणाचे महत्त्व आणि महिला नेतृत्व होण्याची गरज” हा होता. यावेळी उपस्थित मान्यवरांनी सावित्रीबाई फुले यांच्या शैक्षणिक आणि सामाजिक कार्याचा उहापोह केला. त्यांनी शिक्षणाला दिलेले प्राधान्य आणि महिलांना समाजात प्रगल्भ स्थान मिळवून देण्यासाठी केलेल्या कार्यावर प्रकाश टाकला.

मुख्य मार्गदर्शक आनंदा दादा होव्हाळ यांनी आपल्या भाषणात सांगितले की, “सावित्रीबाई फुले यांनी समाजासाठी दिलेले योगदान आजही प्रेरणादायी आहे. शिक्षण हे सामाजिक बदलाचे प्रभावी साधन आहे, आणि महिलांनी आपल्या हक्कांसाठी आणि नेतृत्वासाठी पुढाकार घेणे अत्यावश्यक आहे.”

समाजसेवक शशिकांत दायमा यांनीही आपल्या मार्गदर्शनातून महिला सक्षमीकरणाचे महत्त्व अधोरेखित केले. त्यांनी सांगितले की, “महिला नेतृत्व हे केवळ गरज नसून समाजाच्या सर्वांगीण विकासासाठी अनिवार्य आहे.”

कार्यक्रमात महिलांनी मोठ्या संख्येने सहभाग नोंदवला. सावित्रीबाईंच्या विचारांनी प्रेरित होऊन महिलांनी शिक्षण आणि नेतृत्व क्षेत्रात पुढे येण्याचा संकल्प केला.

महामाया असंघटित कामगार संघटनेच्या वतीने आयोजित हा कार्यक्रम यशस्वी झाला असून, पुढील काळात महिलांच्या सक्षमीकरणासाठी विविध उपक्रम राबवण्याचा निर्धार व्यक्त करण्यात आला.